Tha ainmeachaidhean fosgailte a-nis airson Duaisean Alumni 2022

Leigibh fios dhuinn dè tha sibh a’ dèanamh a-nis!

Bithibh nur ball de Bhuidheann Lìonra Alumni UHI

Halò

Fàilte gu iris a’ Chèitein de chuairt-litir alumni UHI! 'S e mìos togarrach a th' anns a' Chèitean dhuinn oir 's e sin an t-àm a dh'fhosglas sinn ainmeachaidhean airson ar duaisean alumni. Agus airson a’ chiad uair - bidh sinn a’ toirt seachad a trì dhiubh! Ma tha sibh eòlach air duine sam bith a tha airidh air, feuchaibh an ainmich sibh iad gu h-ìosal.

Tha e mìorbhaileach gu bheil na h-uimhir de sgeulachdan fìor mhath mu alumni againn ri am pàirteachadh air a’ mhìos seo - le uimhir de dhiofar chuspairean à com-pàirteachas UHI air fad. Ma tha sibh airson ur sgeulachd a phàirteachadh -cuiribh fios thugainn.

Duaisean Alumni 2022 fosgailte a-nis!

Bidh na Duaisean Alumni againn ag aithneachadh agus a’ comharrachadh sàr cho-thabhartasan is euchdan nan alumni againn. Anns an dealbh tha ar buannaiche airson 2021 Lorna NicNèidh a choisinn an duais mar chomharra air a soirbheachas proifeiseanta a dh’fhàg gun d’fhuair i Rionnag Michelin dìreach còig mìosan às dèidh tòiseachadh sa chiad dreuchd aice mar phrìomh cheann-chòcaire, agus i air a’ chiad cheann-chòcaire boireann aonair ann an Alba a fhuair rionnag ann am 20 bliadhna!

Am-bliadhna tha sinn air leth toilichte fios a thoirt gum bi trì duaisean ann! Tha ainmeachaidhean fosgailte a-nis airson:

1. Duais Buaidh Alumni UHI

Ag aithneachadh alumni a tha a’ nochdadh soirbheachas agus coileanadh sònraichte nan cùrsa-obrach proifeiseanta agus/no com-pàirt agus buaidh chudromach sa choimhearsnachd aca.

2. Duais Alumni UHI airson Neach-buairidh a chum Leas

Ag aithneachadh alumni a tha a’ nochdadh ùr-ghnàthachadh agus dealas airson atharrachaidhean adhartach a nì eadar-dhealachadh a thaobh dhùbhlain chruinneil agus ionadail leithid seasmhachd àrainneachdail.

3. Duais Tosgaire Alumni UHI

Ag aithneachadh alumni a tha a’ leantainn orra a bhith dealasach mu UHI agus a’ cur ris.

Thoiribh an aire:

• Feumaidh gun robh an fheadhainn ainmichte nan oileanaich aig UHI roimhe seo.
• Feumaidh ainmeachaidhean a bhith a-staigh ro mheadhan oidhche Didòmhnaich, 3mh Iuchar 2022.
• Tha duine sam bith di-beathte cuideigin ainmeachadh, a’ gabhail a-steach alumni, oileanaich agus luchd-obrach. Bidh fàilte cuideachd air fèin-ainmeachaidhean.
• Bithear an dùil gun gabh buannaichean pàirt ann an sanasachd iomchaidh sam bith, a’ gabhail a-steach dealbhan-camara agus frithealadh tachartas buileachaidh.
• Bidh luchd-buannachaidh air am brosnachadh gus pàirt a ghabhail ann an co-dhiù aon ghnìomhachd sa bhliadhna a fhuair iad an duais leithid a bhith a’ solar alt naidheachd, sgrùdadh cùise no bhidio.
• Thèid dèiligeadh ri gach ainmeachadh ann an dìomhaireachd.
• Ma tha ceist sam bith agaibh, cuiribh post-d ar n-ionnsaigh.

Ainmichibh a-nis!

Naidheachdan Alumni

Mòran taing don a h-uile duine a tha a’ pàirteachadh an naidheachd rinn! Is fìor thoil leinn a bhith a’ cluinntinn na tha sibh ris!

Bekah NicLeòid BA Gàidhlig agus na Meadhanan, 2018, Sabhal Mòr Ostaig Meal-an-naidheachd air Bekah NicLeòid a chaidh ainmeachadh o chionn ghoirid mar phreasantair ùr CBBC air BBC ALBA! Agus i a’ togail air a’ ghnàth-eòlas a fhuair i aig UHI tron chùrsa TBh aig Sabhal Mòr Ostaig agus bhon cheum aice ann an Gàidhlig agus na Meadhanan, shoirbhich le Bekah an àrainneachd an stiùidio. Agus i a’ fuireach ann an Glaschu an-dràsta, tha i cuideachd air ùine a chur seachad ann an àiteachan eile sa BhBC, a’ dèanamh greis-ghnìomhachais oileanach le urrasachd o MG ALBA aig Radio nan Gàidheal ann an Steòrnabhagh. A’ bruidhinn às dèidh a’ chiad phrògram telebhisein aice agus a’ mìneachadh a slighe gu bhith ag obair ann an craoladh, thuirt Beka: “Tha grunn obraichean eadar-dhealaichte air a bhith agam agus cha robh fios agam da-rìribh dè a bha mi airson dèanamh, ach bha mi a-riamh dèidheil air a bhith air an àrd-ùrlar agus a’ cluich. Rinn mi trèanadh farsaing air a’ chùrsa TBh agam far an do ghabh sinn a-steach beagan den a h-uile càil thairis air dà bhliadhna. Bha a’ chiad latha san stiùidio spòrsail - ach tha e gu math eadar-dhealaichte agus an camara a’ cuimseachadh oirbh! Eadar a’ ghreis-ghnìomhachais agam le Radio nan Gàidheal agus ìre thràthail mo chùrsa-obrach le BBC ALBA, chaidh mo chuideachadh a bhith cinnteach gur e obair anns na meadhanan an rud as fhreagarraiche dhomhsa.” Frank To PDA Cleachdadh Teagaisg ann an Colaistean na h-Alba, 2017, Colaiste Pheairt UHI Chaidh iarraidh air Frank To, a tha na òraidiche ealain aig UHI Inbhir Nis, obair a nochdadh aig taisbeanadh bliadhnail cliùiteach a’ Chomainn Ealain Fhìnealta Ghrafaigich aig na Mall Galleries ann am meadhan Lunnainn sa Chèitean. Bha seo nas lugha na sia mìosan às dèidh dha a chuid obrach gu lèir a reic ann an taisbeanadh Chomann Rìoghail Luchd-ealain Bhreatainn! San dòigh-obrach shònraichte aige nithear feum de dh’fhùdar-gunna agus fùdar-gunna dathte air a dhèanamh de ghunnaichean mì-laghail. Thuirt Frank fhèin: “Tha mi an-còmhnaidh a’ feuchainn ris na crìochan a’ leudachadh a-muigh ann an saoghal nan ealain a thaobh ealain an latha an-diugh. Tha mi airson sealltainn gur e an rud a bhios mi a’ teagasg an rud a bhios mi a’ dèanamh mi fhèin, agus tha seo a’ toirt misneachd do na h-oileanaich agam a tha a’ tighinn am bàrr mar an ath ghinealach de luchd-ealain Albannach an latha an-diugh. Tha ealain Frank cuideachd a’ cosnadh cliù eadar-nàiseanta, agus i ga cruinneachadh leis an actair Sir Patrick Stewart agus an neach-cruinneachaidh ann an Eabharc Nuadh, Michel Witmer, a bhios a’ crochadh a dhealbhan còmhla ri cuid Picasso, Dine agus Warhol. George Guinne BSc (le Urram) Cruinn-eòlas, 2020, UHI Inbhir Nis Meal-an-naidheachd air an tosgaire alumni George a chaidh a thaghadh mar Chomhaltach de Chomann Rìoghail a’ Chruinn-eòlais na bu tràithe am-bliadhna mar chomharra air an rannsachadh is an cleachdadh proifeiseanta ùr-ghnàthach aige. Nuair a bha e aig UHI, rinn George rannsachadh air buaidh an eilein teas bhailtich ann an Inbhir Nis, a’ chiad fhear de a sheòrsa a chaidh a dhèanamh sa bhaile, agus aon den bheagan sgrùdaidhean coltach ris air feadh na cruinne. Dh’adhartaich e an ùidh rannsachaidh aige ann an eòlas-sìde bailteil agus atharrachadh gnàth-shìde aig Oilthigh Reading, mus do thill e don Ghàidhealtachd gus dreuchd ùr a ghabhail mar Oifigear Ro-innleachd Atharrachadh Gnàth-shìde aig Comhairle Mhoireibh. Thuirt e fhèin: “Tha e na urram a bhith air mo thaghadh mar Chomhaltach de Chomann Rìoghail a’ Chruinn-eòlais. Chaidh mo thuras mar chruinn-eòlaiche a chumadh leis na cothroman gun chrìoch a fhuair mi mar oileanach. ’S e a’ Ghàidhealtachd an t-àite as fheàrr air an t-saoghal airson cruinn-eòlas ionnsachadh, agus gheibh sibh deagh thaic airson sin a dhèanamh aig UHI.” Na dhreuchd mar thosgaire alumni, tha George air tilleadh gu UHI grunn thursan mar labhraiche air aoigheachd agus gus taic a thoirt do dh’oileanaich le leasachadh is cothroman dreuchdail. A bheil ùidh agaibh a bhith nur tosgaire? Tuilleadh fiosrachaidh an seo!

Rachel NicGilleUidhir BA (le Urram) Obair-aodaich Ealain Fhìnealta, 2020, Sgoil Ealain Mhoireibh Meal-an-naidheachd air Rachel, neach-ealain ann an Eilginn agus co-bhuannaiche Dhuais Muinntearais chliùiteach Glenfiddich na bliadhna seo a chaidh a thoirt seachad aig Taisbeanadh Acadamaidh Rìoghail na h-Alba do luchd-ceumnachaidh ùr ann an Dùn Èideann, New Contemporaries. Is i Rachel a’ chiad neach-ealain à UHI a choisinn an duais, agus bidh i a’ tighinn còmhla ri luchd-ealain eile às gach ceàrn den t-saoghal aig prògram Luchd-ealain air Mhuinntireas Glenfiddich aig taigh-staile Bhaile nan Dubhach as t-samhradh am-bliadhna. Gheibh sibh tuilleadh fiosrachaidh mu Rachel agus an obair aice air an làraich-lìn aice. Amy Rayner BA (le Urram) Ceòl Mòr-chòrdte, 2014, Colaiste Pheairt UHI O chionn ghoirid chaidh Amy Rayner, agus an còmhlan aice Go To Girl, a chrùnadh mar bhuannaichean na farpais eadar-nàiseanta ‘Player Plus Sessions’ le Fender a chaidh a bhreithneachadh le proifeiseantaich sa ghnìomhachas leithid Nile Rodgers bho Chic agus Ellie Rowsell bho Wolf Alice. ’S e còmhlan-ceathrair indie pop stèidhichte ann am meadhan na h-Alba a th’ ann an Go To Girl. Tha an cothlamadh tarraingeach aca de rifean giotàir ruitheamach, co-sheirmean gutha tiamhaidh agus nòs synth pop air an cliù a dhaingneachadh mar chòmhlan le brìgh ghabhaltach a chumas greim air duine fad làithean. Leis an duais a fhuair iad de dh’ùine ann an stiùideo bha comas aca an clàr singilte as ùire aca ‘Twenty Something’ a dhèanamh, a tha na dhuan leotha don ghinealach aca fhèin – ri fhaighinn a-nis ri a shruthadh agus a luchdachadh a-nuas! Blair Watson BSc (le Urram) Saidheans Mara, 2017, SAMS Leughaibh sgeulachd alumni Blair, far a bheil e a’ toirt cunntas fosgarra, geur-bheachdach air na dh’fhiosraich e agus e ag ionnsachadh saidheans mara anns an Òban; co ris a bha an turas aige coltach bhon a cheumnaich e agus mar a chuidich a cheum agus a lìonraidhean aig SAMS le bhith a’ faighinn a dhreuchd thogarrach mar Oifigear Pròiseict ag obair ann am for-ruigheachd agus conaltradh saidheans mara aig Dynamic Earth ann an Dùn Èideann! An t-Oll Marc Chivers PhD, 2017, UHI Sealtainn Tha Marc air leabhar fhoillseachadh o chionn ghoirid leis an tiotal ‘Shetland's Boats: Origin, evolution and use’  Tha an leabhar seo mar thoradh air an rannsachadh PhD aige agus tha e a’ sgrùdadh na pàirte uile-chudromaich a bha bàtaichean dùthchasach a’ cluich ann am beatha làitheil Shealtainn, a’ coinneachadh ri luchd-togail bhàtaichean agus ris na daoine a bha an dòigh-beatha an urra ris na bàtaichean muir-acainneach seo. Chì sibh agallamh le Marc an an seo, far a bheil e a’ bruidhinn mun leabhar ùr aige agus a’ toirt sealladh dhuinn air a’ phàirt uile-chudromach a bha bàtaichean fosgailte sònraichte Shealtainn a’ cluich ann am beatha làitheil Shealtainn. Cuideachd, ann an 2018 thàinig Marc còmhla ri alum eile o UHI, an t-arc-eòlaiche an t-Oll Esther Renwick (PhD, 2017, Colaiste Arcaibh UHI) a stèidheachadh Moder Dy CIC, companaidh leas coimhearsnachd a tha ag obair gus mothachadh a dhùsgadh air dualchas mara crìonach Shealtainn le bhith a’ dol an coluadar ri coimhearsnachdan ionadail agus a’ toirt taic dhaibh tro bhith gan toirt a-steach ann am pròiseactan rannsachaidh ioma-chuspaireil prataigeach. Tuilleadh fiosrachaidh mu dheidhinn Moder Dy.

Naidheachdan UHI

Tha toraidhean rannsachaidh aig ìre chruinneil a’ taisbeanadh cho cudromach ’sa tha ceangal coimhearsnachd UHI Tha cha mhòr trì chairteal de rannsachadh UHI air a bhith air a sheòrsachadh mar ‘sàr-mhath aig an ìre chruinneil’ no ‘sàr-mhath aig an ìre eadar-nàiseanta’ ann an sgrùdadh sàr-eòlach ùr, a chaidh a ghabhail os làimh gus càileachd an rannsachaidh ann an ionadan foghlaim àrd-ìre na RA a mheasadh. Chaidh rannsachadh ann an slàinte is banaltramas, siostaman talmhainn agus saidheansan àrainneachdail agus mara, àrc-eolas, foghlam, eòlas sgìreil, Gàidhlig agus eachdraidh uile aithneachadh leis an Fhrèam Sàr-mhathas Rannsachaidh. Sa mheasadh as ùire seo chaidh sealltainn air caochladh eileamaidean de dh’obair 147 luchd-rannsachaidh tarsainn chom-pàirteachas UHI. Rinneadh sgrùdadh air buaidh an rannsachaidh aca, a’ sealltainn mar as urrainn do rannsachadh cuimsichte aig UHI taic a thoirt do shoirbheachas eaconamach seasmhach agus in-ghabhalach nar coimhearsnachdan, a bharrachd air dèiligeadh ri cuid de na dùbhlain as motha a tha aig Alba. Thuirt prionnsapal agus iar-sheansalair UHI, an t-Àrd-ollamh Todd Walker: “Is e deagh thoradh a tha seo do UHI agus tha e ag aithneachadh gu bheil sinn thar a bhith comasach ar làrach a sheasamh ann an àrainneachd rannsachaidh a tha fìor fharpaiseach. Tha sinn air na bha sinn an dùil a choileanadh agus air a dhol thairis air, a’ togail air ar soirbheachas ann an 2014. Bu chòir don luchd-obrach, na h-oileanaich agus na coimhearsnachdan againn a bhith glè mhoiteil à UHI a tha a’ lìbhrigeadh ìre àrd de rannsachadh aig an ìre ionadail, roinneil, nàiseanta agus eadar-nàiseanta. Tuilleadh fiosrachaidh Dreach ùr do UHI a’ comharrachadh gluasad gu far a bheil ionnsachadh a’ ciallachadh barrachd Nochd com-pàirteachas UHI dearbh-aithne lèirsinneach ùr sa Mhàrt gus coluadar ri coimhearsnachdan a neartachadh agus gus margaideachd nas èifeachdaiche a dhèanamh air na tha e a’ tabhann tro theaghlach bhranndaichean co-cheangailte agus so-aithnichte. A bharrachd air dòighean-obrach ùra a thaobh fotografachd agus dealbhadh, tha an t-atharrachadh a’ gabhail a-steach suaicheantas ùr air feadh nan àrainnean, stèidhichte air na litrichean UHI, agus comharra cur-ris is iar-shreath-cinn fighte a-steach: ‘far a bheil ionnsachadh a’ ciallachadh barrachd’. Deich bliadhna on a fhuaras inbhe oilthigh, tha UHI air bunait làidir a chur na h-àite gus gluasad a-steach gu caibideil ro-innleachdail ùr stèidhichte air feallsanachd ‘Dùraigeadh a bhith diofaraichte’, a’ daingneachadh an àite aige mar chom-pàirteachas le fòcas roinneil de cholaistean agus ionadan rannsachaidh neo-eisimeileach a tha a’ còmhdach na sgìre as motha de ghoireas àrainneach sam bith san RA. Tuilleadh fiosrachaidh

Ionad ùr gus buil a dhèanamh de lìoragaich Tha obair-lann aig SAMS a’ cuideachadh le bhith a’ fuasgladh na comasachd mòire a tha aig lìoragaich mar ghoireas seasmhach airson bathar ùr agus fuasglaidhean àrainneachdail às dèidh dhaibh ionad ùr £681,641 fhosgladh. Tha mu 3,000 seòrsa de fhàs-bheairtean micreoscopach leithid lìoragaich mara is fìor-uisge, cyanobacteria agus protosoa, a bharrachd air cuid de fheamainn agus galar-ghineanan feamainn anns a’ Chruinneachadh Ghiollachaidhean Lìoragaich agus Protosoa (CCAP). Bidh an cruinneachadh, a tha cha mhòr 100 bliadhna a dh’aois, agus e air aon den fheadhainn as sine agus as bith-iomadaiche san t-saoghal, aig cridhe ionad ùr airson cinneasachadh agus mion-sgrùdadh lìoragaich, an t-Ionad CCAP-ARIES (Rannsachadh, Ùr-ghnàthachadh agus Saidheans Àrainneachdail Lìoragaich). Cuidichidh an goireas ùr-nodha seo luchd-saidheans air feadh an t-saoghail gus bathar agus cungaidhean ùra a lorg agus an saoghal nàdarra a thuigsinn ann an clìomaid a tha ag atharrachadh. Tuilleadh fiosrachaidh Tha UHI a' sireadh bheachdan na coimhearsnachd air an Ro-innleachd Eileanach aige Tha UHI air suirbhidh poblach a chur air bhog feuch dè cho math is a tha cuspairean ro-innleachdail na Ro-innleachd Eileanaich a’ co-thaobhadh ri prìomhachasan leasachadh coimhearsnachd is eaconamach airson eileanan Arcaibh, Sealtainn agus Innse Gall agus dè cho math is as urrainn do na cuspairean taic a chur ris na prìomhachasan sin. Tha an suirbhidh air-loidhne fosgailte do bhuill den choimhearsnachd, buidhnean poblach, gnothachasan agus an roinn shaor-thoileach anns na trì eileanan gu 6 Ògmhios 2022. Cliogaibh an seo gus pàirt a ghabhail san t-suirbhidh. UHI an dùil HNC den ath ghinealach a thòiseachadh ann an Gàrradaireachd Bid an HNC den ath ghinealach ann an Gàrradaireachd so-atharraichte agus sùbailte gus freagairt air feumalachdan àrainneachd obrach a tha a’ sìor atharrachadh agus bheir e cothrom do dh’oileanaich sgilean teignigeach a thogail a bhuineas gu sònraichte don chuspair mar ullachadh airson cosnadh ann an roinn an fhearainn. Tha oileanaich gàrradaireachd aig UHI fortanach gu leòr oideachadh fhaighinn ann an cuid de na gàraidhean as iongantaiche ann an Alba, leithid Mount Stuart ann an Eilean Bhòid, agus leis an HNC seo den ath ghinealach nithear cinnteach gum bi iad uidheamaichte airson a bhith nan stiùirichean gnìomhachais san àm ri teachd. Tuilleadh fiosrachaidh mu bhith a’ cur a-steach airson an HNC den ath ghinealach aig UHI ann an Gàrradaireachd

Buannachdan do dh’Alumni

Tha cothrom aig alumni UHI air farsaingeachd de bhuannachdan agus seirbheisean.

Mas urrainn dhuibh lasachadh a thairgsinn do na co-alumni agaibh no ma tha molaidhean sam bith agaibh a bhith a’ cur ris an fharsaingeachd de bhuannachdan a tha sinn a’ tairgsinn – bhitheamaid air leth toilichte fios fhaotainn bhuaibh!

Taic fad beatha le dreuchdan Tha an sgioba Dhreuchdan againn an seo a chuideachadh leibh a bhith a’ leasachadh agus a’ riaghladh a’ chùrsa-obrach agaibh san àm ri teachd. Faodaidh sibh coinneamhan iùil a chur air dòigh, a’ Bhùth Dhreuchdan a rannsachadh, feall-agallamh a chur air dòigh agus ur CB no foirm tagraidh a luchdachadh suas gus am faigh sibh beachdan air. Dìreach clàraichibh le  NaThaRomham.

Lasachadh de 10% air ionnsachadh iar-cheum Tha lasachadh de 10% ri fhaotainn air a’ chìs oideachais airson a h-uile cùrsa iar-cheum teagaisgte agus prògram rannsachaidh iar-cheum do dh’alumni a cheumnaich le ceum teagaisgte fo-cheum no iar-cheum. Tuilleadh fiosrachaidh

Cothrom air Goireasan-d do dh’alumni Faodaidh sibh feum a dhèanamh de chaochladh Ghoireasan-d gun phàigheadh, a chuideachadh leis an ionnsachadh fad beatha agaibh an dèidh dhuibh an t-oilthigh fhàgail. Airson sin fhaotainn, clàraichibh an seo.

Where learning means more | Far a bheil ionnsachadh a' ciallachadh barrachd

www.uhi.ac.uk

Tha ur prìobhaideachd cudromach dhuinn

Tha an t-oilthigh dealasach a bhith a’ dìon an fhiosrachaidh phearsanta agaibh a rèir nan laghan a thaobh dìon dàta agus fiosrachadh pearsanta.

Tha am brath prìobhaideachd seo a’ mìneachadh mar a thèid am fiosrachadh pearsanta agaibh a làimhseachadh is uisneachadh leis an oilthigh.

Faodaidh sibh stad a chur air fo-sgrìobhadh ris a’ post-d seo aig àm sam bith, dìreach thoiribh briog air a’ cheangal gu h-ìseal, ach bhitheamaid duilich ur faicinn a’ falbh…

Unsubscribe

UHI

Ness Walk, Inverness, IV3 5SQ | Slighe Nis, Inbhir Nis, IV3 5SQ