Seumas Mac an Tuairneir

“Thòisich mo thuras le Oilthigh na Gàidhealtachd agus nan Eilean ann an 2014. Aig an àm, bha mi gun dachaigh agus ag obair ann an obair pàirt-ùine nach tug mòran dùil air adhartas no cothrom dhomh mo shuidheachadh atharrachadh. A’ beachdachadh air an àm ri teachd agam gu faiceallach, chuir mi a-steach iarrtas sgrùdadh a dhèanamh air Leasachadh Seasmhach aig Colaisde a’ Chaisteil UHI gus mo dhreuchd atharrachadh.

Chòrd e rium a bhith a’ sgrùdadh Leasachadh Seasmhach. Bha mi fortanach gu leòr gun d’ fhuair mi obair anns an raon agam letheach slighe tron treas bliadhna agam! Cha robh mi eadhon air ceumnachadh, agus bha cothrom agam mu thràth na sgilean ùra agam a chur an gnìomh. San Dùbhlachd 2018, chaidh mi a-steach do Urras Leasachaidh Chaol Chataibh mar Neach-taic Ceangal Coimhearsnachd, a’ leantainn air adhart le mo cheum pàirt-ùine.

Ghluais mi gu Eadar-aghaidh Treas Roinn na Gàidhealtachd (HTSI) san Fhaoilleach 2019, an dèidh dhomh na modalan acadaimigeach uile de mo cheum a chrìochnachadh. An sin, chuidich mi le bhith a’ leasachadh Phlanaichean Sgìreil Dhrochaid Sguideil is Inbhir Pheofharain agus chuidich mi grunn ghnìomhachdan mar fhreagairt air fios-air-ais na coimhearsnachd.

Cheumnaich mi san Dàmhair 2019 agus san t-Samhain chaidh mi a-steach do Iomairt na Gàidhealtachd agus nan Eilean (HIE) mar Mhanaidsear Leasachaidh, ag obair le buidhnean coimhearsnachd agus iomairtean sòisealta ann an sgìre Linne Mhoireibh A-staigh. Nuair a bhuail an galar sgaoilte sa Mhàrt 2020, ged a bha mi fhathast ùr, bha mi ag obair gus buidhnean coimhearsnachd a chomharrachadh air feadh sgìre Linne Mhoireibh A-staigh a bha a’ leasachadh agus a’ lìbhrigeadh oidhirpean faochaidh dhaibhsan a bha feumach sna coimhearsnachdan aca, gus am b’ urrainn dhuinn maoineachadh Riaghaltas na h-Alba a stiùireadh gu cuideachadh anns na h-oidhirpean sin. Mar a bhios mi a’ sgrìobhadh seo a-nis, tha e fhathast a’ coimhead caran duilich, ach tha mi moiteil fios a bhith agam gu bheil mi air prìomh phàirt a ghabhail ann a bhith a’ cuideachadh choimhearsnachdan na Gàidhealtachd aig an àm seo."