Bidh UHI agus HISA ag ath-ùrachadh an dealais a thaobh sunnd oileanaich le Aonta Slàinte Inntinn Oileanaich

Tha Oilthigh na Gàidhealtachd 's nan Eilean (UHI) agus Comann Oileanaich na Gàidhealtachd 's nan Eilean (HISA) moiteil ainmeachadh gu bheil an co-aonta slàinte inntinn oileanaich aca (SMHA) airson 2024-2026 air a chur air bhog.

Tha an t-aonta ùraichte seo ag ath-dhaingneachadh ar dealais choitchinn a thaobh slàinte inntinn is sunnd oileanaich a leasachadh, le bhith a’ togail air iomairtean a bh’ ann roimhe, ag ùrachadh nan seirbheisean taice a th’ ann mar-thà, agus a’ toirt a-steach cheumannan ùra le fios air ais bho oileanaich. Tha e a’ mìneachadh prìomh ghnìomhan gus dèanamh cinnteach gu bheil a h-uile oileanach a’ faireachdainn sàbhailte, a’ faighinn taic agus comasach air soirbheachadh.

Tha com-pàirteachas làidir aig UHI agus HISA a tha cuimsichte air a bhith a’ lìbhrigeadh eòlas air leth do dh’oileanaich. Tha an SMHA na phrìomh phàirt den cho-obrachadh seo agus chaidh a leasachadh mar phàirt de dh’iomairt ‘Think Positive’ aig NUS (Aonadh Nàiseanta nan Oileanach) Alba. Gach bliadhna, tha sinn a’ leantainn oirnn a’ togail air a’ phlana seo, a’ co-chruthachadh amasan agus cheumannan buaidh le taic bho oileanaich UHI.

Le bhith a’ measadh amasan an ama a dh’fhalbh agus a’ cur an gnìomh ghnìomhan cuimsichte, bidh an t-aonta a’ stiùireadh adhartas leantainneach leis an amas fharsaing air slàinte inntinn agus sunnd adhartach a chumhachdachadh do gach oileanach aig UHI. Tha an dòigh-obrach seo a’ co-thaobhadh ar feallsanachd – anns a bheil sinn a’ tuigsinn gu bheil iomadh taobh de eòlas oileanaich eadar-cheangailte a dh’fhaodadh buaidh a thoirt air an slàinte is sunnd.

As t-Earrach 2024, choilean Sgioba Slàinte Inntinn is Comhairleachaidh UHI agus HISA suirbhidh oileanach gus na raointean de shlàinte inntinn agus sunnd as cudromaiche do dh’oileanaich a chomharrachadh. Tha beachdan bhon t-suirbhidh seo, còmhla ri fios air ais bho chòmhraidhean eile, air cumadh dìreach a thoirt air prìomhachasan SMHA 2024-2026. Tha an dòigh-obrach seo air a stiùireadh le oileanaich a’ dèanamh cinnteach gu bheil an t-aonta a’ dèiligeadh ri fìor fheumalachdan agus a’ toirt atharrachadh brìoghmhor gu buil.

Am measg prìomh thachartasan an SMHA bha seirbheisean taic leasaichte, mothachadh slàinte inntinn nas fheàrr, agus àiteachadh cultar adhartach mu shunnd. Tha an t-aonta ag amas air co-obrachadh, goireasan ruigsinneach, trèanadh do luchd-obrach agus oileanaich, agus ceumannan for-ghnìomhach gus dèiligeadh ri dùbhlain.

Thuirt Ceann-suidhe HISA, Uilleam Caimbeul:

“Tha mi moiteil mu bhith a’ cur air bhog Aonta Slàinte Inntinn Oileanaich 2024-2026, a tha a’ comharrachadh clach-mhìle chudromach nar dealas coitcheann airson sunnd oileanaich OGE. Aig HISA, tha sinn ag aithneachadh gu bheil slàinte inntinn aig cridhe gach taobh de bheatha nan oileanach, agus tha an t-aonta seo a’ nochdadh ar diongmhaltas a thaobh dèanamh cinnteach gu bheil a h-uile oileanach a’ faireachdainn gu bheil iad a’ faighinn taic, tuigse agus cumhachd airson soirbheachadh.

“Tro cho-obrachadh agus lèirsinn nan oileanach againn, tha sinn air aonta a chumadh a tha a’ dèiligeadh ri fìor fheumalachdan agus a bhios a’ stiùireadh atharrachadh brìoghmhor. Le bhith a’ togail air soirbheasan an ama a dh’fhalbh agus a’ toirt a-steach iomairtean ùra, tha sinn ag àrach cultar a tha a’ toirt prìomhachas do shlàinte inntinn agus a nì cinnteach nach eil oileanach sam bith a’ faireachdainn air fhàgail às. Còmhla ri UHI, cumaidh sinn oirnn ag obair gu cruaidh gus àrainneachd thaiceil agus in-ghabhalach a lìbhrigeadh far an urrainn do dh’oileanaich an làn chomais a choileanadh.”

Tha Allie Scott agus Lorna NicFhearghais bho Sgioba Slàinte Inntinn agus Comhairleachaidh UHI ag ràdh:

“Tha sinn air leth toilichte ainmeachadh gu bheil Aonta Slàinte Inntinn nan Oileanach (SMHA) air a chur air bhog airson 2024-26 tarsainn a’ chom-pàirteachais. Tha an iomairt seo a’ comharrachadh a’ cho-obrachaidh làidir eadar Sgioba Slàinte Inntinn agus Comhairleachaidh UHI, HISA, agus ar com-pàirtichean acadaimigeach, a’ dèanamh cinnteach gu bheil slàinte inntinn oileanaich fhathast na àrd-phrìomhachas a rèir ar Ro-innleachd Slàinte Inntinn ùraichte. Bidh e a’ brosnachadh conaltradh fosgailte mu shlàinte inntinn, a’ brosnachadh chothroman airson co-obrachadh agus mothachadh, agus a’ toirt seachad shlighean soilleir gu taic nuair a bhios feum air. Tha an SMHA a’ daingneachadh ar dealais leantainnich a thaobh co-ionannachd, iomadachd agus in-ghabhail, ag àrach faireachdainn de bhuinteanas agus a’ dèiligeadh ri iomallachd sòisealta oileanaich. Tha sinn dealasach a thaobh slàinte inntinn is sunnd oileanaich àrdachadh gus cuideachadh le bhith a’ dèanamh cinnteach à builean soirbheachail dha na h-uile.”

Airson tuilleadh fiosrachaidh agus airson an làn aonta a leughadh, tadhail air duilleag-lìn HISA.